حيرتيني

حيرتيني لأني بحبك حب كبير
بحب شمسك وبحب قمرك بالليل
بحب جوك، وهو حر وهو جميل
بحب سماكي، بحب رملك والنيل.
وقد حبي ليكي فيه في قلبي إحساس ثقيل
إحساس كريه وقريب من الكره كتير
بكره حكومتك وريسك البخيل
بكره شعبك الطيب المسالم السئيل
بكره السلبية والعشوائية والتفضيل
والوسطة والعنصرية والفقر الذليل
مبئتش عارفة ألاقي لمشاعري ليكي دليل
بحبك، بكرهك، بحب كرهي ليكي الكبير
بكرهك، بحبك، بكره حبي ليكي الأصيل
يا بلدي، يا غلبانة، يا مصر يا بنت النيل
ياللي شوفتي من حكامك على مر السنين الويل
من أسلحة فاسدة لخصخصة لسرقة ونهب رذيل
يا أمه 7000 سنة حضارة وعمر طويل
وينفع في ايه التاريخ اذا الحاضر عليل
كله غش وخداع وكذب جيل ورى جيل
يا بلدي، يا غلبانة، يا مصر يا بنت النيل
بنت ايه بقى؟ ما اتهتك عرضك بالنهار وبالليل
فيكي أمل؟ أفضل احلم حلمي الجميل؟
ولا أخلي كرهي ليكي يغلب الحب الأصيل؟
وأضور لحبي ليكي على بديل؟
يا بلدي، يا غلبانة، يا مصر يا بنت النيل
حيرتيني ولا حيرة الحبيبة في ليل طويل

07.2007
Advertisements